خُد البِزَه .. الكلمه دي مش عيب .. لأ ما تتخضش .. دي من أغنيه للفنانه نعيمة المصريه كلمات بديع خيري و ألحان سيد درويش
( اسمع كده https://www.youtube.com/watch?v=cB8jG6gX55s )
بتقول فيها معنى جميل جدا في جملة خد البزه .. عايزه تسكت الطفل الرضيه و تهدهده و كده ..
خد البزه و اسكت .. خد البزه و نام !!
بكره تعيش و تكبر .. و تبقى تمام !!
نلاحظ هنا إن ممكن نتبع نفس المبدأ بنفس الأسلوب الطربي في الحياه اليوميه .. هستعرض معاكم أهم 5 بزات ممكن يتاخدوا !!
أول بزه .. خد البزه و اتهد .. دي بتقولها في حالة أي حد حاول إنه يناقش معاك أي قرارات شخصيه أو حياتيه بشكل فضولي سلبي .. أديك مثال :
- س : ووو اللي إنت كنت معاهم فين بقى و لا سبتهم ليه ؟
- إنت : خد البزه و اتهد .. و لازم تقولها و انت مبتسم .. بكل الضحك .. اللي هوا أنا لو كنت عايز أحكي كنت حكيت أي حاجه من اللي فضولك واكلك فيها بس للأسف ما يخصكش يا معلم .. و لازم الضحكه .. تهون أي جراح يا جدع !!
نكمل .. البزه التانيه .. خد البزه و اتلهي .. دي بقى في النقاشات الفلسفيه السياسيه بنظرات أبعد من البعد الباعد بينا و بين الهجره .. ما ينفعش .. أكرر .. ما ينفعش تخش في أي نقاش مع أي حد مقتنع باللي بيحصل بأي شكل من الأشكال أو بيبربر أو بيطبل أو كنبه أو أو أو .. النوع ده تديله بزة اتلهي .. شفت العصفورة .. اي بعته كانت .. هقلك مثال :
- الهدف : اللي حصل من سواق التوكتوك مالــ .....
إنت : اتلهي توكتوك ايه .. شفت صور سما المصري الجديده !!
كده إنت عملت حاجتين .. إنت لهيته .. و لهيت دماغك .. و لهيت الحاضرين معاكم من نقاش هتوصل فيه لسب الدين .. يا صاحب العمر ليه أهداف أهم بكتير من أغنك توعي حد .. بكل الحب و التقدير ترفعله هييل هتلر !!
تالت حاله هيا : هات البزه اللي أنا اديتهالك .. دي إنت اللي هتاخد البزه مش هوا .. بس مش على بقك على طول .. اغسلها الأول عشان ميكروبات التعلق و الصعبانيات .. ليه بقى .. عشان إنت اديتهم البزه زياده عن اللزوم .. فزاطت و ناموا نِنَه و نسيوا صح الغلط و غلط الصح .. و بقت بزتك مجرد مهدئ .. نوع من أنواع الفقع النفسي .. فخد بزتك و ريح نفسك شويه و نام عشان إنت عندك شغل و مستقبل !!
رابع بزه .. خد البزه و عليها بوسه !! دي بتبقى للناس الحلوه .. شكلا و مضموناً .. دي بزه الإستمتاع مش النوم .. عشان اللي بيريح ده نعمه و تشكر ربنا عالنعم دي .. و سلاما عليهم .. طريقتها سهله .. عبرلهم كل واحد بالشكل اللي بيوصله إنك بتحبهم و إنهم فارقين معاك .. الكلمه الحلوه بتشفي .. بتنضف من جوه .. فكن جميلاً .. هتلاقي !!
آخر بزه .. من البزات اليوميه اللي مافيهاش تفكير .. خد البزه و حاضر !! دي للأهل .. مش هتعرف تكسب صراع معاهم .. الضد مميت .. مقرف و غير فعال غير قابل للتغيير .. فانت هنا اديتهم بزة الطاعه .. مثال :
- العائل : إنت بقيت بتتأخر و مالكش مستقبل و بيت يلمك و تيجي تشوف ولاد الناس بيـــ ........
- إنت : خد البزه و حاضر هنزل أنزل الزباله قبل ما أنام !!
هتلاقي الموضوع اتسهل و كله ماشي بنور الله !!
جرب .. إن أمكن حد هيزعل شويه .. بس اعملها بكل الحب .. هتنجح و الموضوع هيعدي .. مزيكتك بس و الناس الكويسه و حالك .. هتفرق !!
