ده الجزء التاني من سلسلة البوح باللي بيحصل ليا في حاجات كتير في حياتي .. في الجزء الأول كنت بتكلم عن التفاؤل و الأمل و تحديد خطوات و حاجات كتير في حياتك سلبيه و إيجابيه .. الجزء ده هتكلم فيه عن ماذا يحدث لو اتخزوقت في حد تعرفه .. ازاي تعرف الخازوق جي من أنهي ناحيه .. و ماذا تفعل مع المخزوق .. ناخدها خطوه خطوه .. إزاي تعرف إن في خازوق متحضر .. في العموم لازم تعرف إن البشر كائنات متوقعه .. و تصرفاتهم واحده .. و خصوصاً مدعي النصاحه و الذكاء و دول ما أكترهم في حياة كل شخص .. فما تتعاملش مع الناس على إنهم كائنات غامضه بالعكس .. خليك واثق إن إنهم هيعملوا نفس الحاجه مع إختلاف تفاصيلها و خطواتها .. مبدأياً كده .. إنت أكيد ليك مجموعة صحاب كبيره .. و ليك شلتك اللي بتتحرك بيهم و معاهم .. اتعامل بكل الأخويه و الحب و الجدعنه .. لحد ما هتلاقي في وقت ما تضارب في المصالح .. تضارب في التفكير .. تضارب في الأسس المحركه لهذه العلاقه .. وقتها بس هتلاقي الشله لتحولت لشلل أصغر .. كل اتنين مع بعض أو كل واحد بدأ يتحرك بره الشله لعد راحته في الأنشطه أو الكلام أو أي حاجه كانت بتتعمل مع الصحاب دي .. وقتها ما تعملش زيي .. أنا فضلت متوقع إن الموضوع ده سحابة صيف .. طلعت شتويه و بزعابيب .. بس ما كانتش باينه .. اتصرفت على أساس إنه عادي .. مش معنى إن تضارب المصالح أو التفكير هتخلي الشله تتفك .. بس طبعا دي أضغاث أحلام .. التصرف الصحيح في اللحظه دي .. هي المواجهه .. لأنك لو ركنت في قلبك اللي بيحصل و المواقف هتتحول لثقب أسود دودي متحرك .. هيمص من طاقتك و تفاؤلك و من كل اللي انت بتعمله في حياتك .. و هيحوز على جزء كبير جداً من تفكيرك .. في حين إن مش ده اللي بيحصل مع الأطراف الأخرى .. كل واحد عايش حياته و قشطه عادي يعني .. فواجه و يا إما هتتحل و يا إما هتخسر .. و لو خسرت دلوقتي أحسن ما تخسر قدام .. ده بالنسبة للصحوبيه .. بالنسبة للعلاقات العاطفيه .. في حالتين منتشرين قدامي في المجتمع اليومين دول .. الحاله الأولى .. هي تتمثل في بنت حبت بقف .. و البقف ده يا خطبها يا لسه بيعشم أهلها في خطوبه .. طبعا زي أي بقف شرقي واخد اعتماده من معهد العلوق و بتقدير كمان .. هوا بيتعامل بمبدأ خليك كل حاجه في حياة البنت دي .. دي فريستك انت .. بتاعتك مش بتاعت حد تاني .. و افضل اتعامل على الأساس ده .. غيرلها صحابها .. و حتى لو صحابها كويسين .. غيرهم .. ما تسيبش أي فرصه حد يأثر عليها غيرك .. و بالتالي لو إتأخر في أي يوم عن التواصل معاها .. هتحس بوحده شديده فشيخه .. طب و لو مثلا مثلا حب يسيبها أو لقى واحده تانيه مريحاه في 2% زياده .. يقوم العلق ينفض للأولانيه .. تقوم البنيه تغني عندي طول الوقت رغبه في القعاد على الأرض وحدي .. و تكتئب و تتنفض و تتحبس جوه مربع العلاقه اللي هيا مش فاهماها .. طبعا كل ده بيحصل معاها و البيه التاني مش حاسس .. ما هو رابط فرخه جنبه و مش مقدر .. دي الحاله الأولى .. الحاله التانيه .. هيا مرتبطه بالحاله الأولانيه بس من ناحية الولد .. واحد ابن ناس فاهم متعلم .. و حلو في حاجات كتير خلقيا بقى فكريا .. أي منكش من دول .. عرف بنت .. أعجب بيها زي أي ذكر .. بيتعمق معاها في العلاقه .. يبقى صديق .. و صديق قوي كمان .. و يعلن عن إنه بدأ يعجب بالبنت .. و يكتشف إنها في مربع العلاقه اللي في الحاله الأولانيه .. فلا هيطول لا سما و لا أرض .. لأنها مش عارفه تخرج من العلاقه الأولانيه مع البقف .. و بكده نعرف إن البقف ده دايماً عامل مشترك في أذى شخصين .. طيب .. دي شويه حنكشه و خروج عن اللي كنت بحكي فيه .. بس دي من العلامات اللي هتعرف بيها ان في خازوق جايلك بشكل ما .. يا إما في علاقات الصحاب .. أو في العلاقات العاطفيه على مستوى الولد و البنت .. هنقفل المقاله على كده .. و الجزء الجي هيبقى ماذا نفعل مع المخزوق .. و هحط حلول عمليه من تجارب شخصيه اتعرضت لها الفتره اللي فاتت و من تجارب شفتها و كنت طرف فيها بشكل أو آخر .. و من هنا لغاية ما أقول الحلول اللي وصلتها .. دمتم مش متخزوقين .. و حرص و لا تخون .. و ما حك ظهرك إلا ظفر سعادتك و سلام و نعمه
