طبق فول من عند عم إبراهيم ! ! ( كتبت بتاريخ 20 يوليو 2010 )

إمبارح كنت سهران في الشارع مع 2 صحابي ( حجازي و عبده و ما حدش يقولي هما مين عشان انا بحكي موقف مش بحكي عن صحابي ) . .

 أخدنا الكلام لغايه الساعه 9 الصبح لقيت حجازي بيقول : ما تيجوا يا جماعه ناكل من عند عم إبراهيم ! مين عم إبراهيم ده . . ده صاحب عربيه فول . . توكلنا على الله و قلنا ماشي . . رحنا أكلنا من عنده طبق فول من أيام الفراعنه ( كنايه على انه قيافه ) . . بعدها الحساب كام يا عم إبراهيم . .

 الطبق بجنيه و نص . . طبعا دي كانت أول مره أكل من على عربيه فول بصراحه حاجه فخامه يعني . . طبعا حد هيقولي فين زيتونه الموضوع . . أقلك ( قصدي الحد اللي سأل اللي ما سألش ما يكملش قراءه ) . .

الناس اللي كانت واقفه معانا بتاكل من عند عم إبراهيم . . طلبه . . دكاتره . . و في ناس لابسه بدل شكلها كده يقول انهم ناس مهمه . . ربات بيوت . . كان في اتحاد رابطه المواطنين الغلابه . . مناظر الناس كانت كلها فيها لمحة ( مش باقي مني ) . .

حد هيسأل ( غير الحد الأولاني ) انته ليه بتقول كده . . هيا العمليه ناقصه اكتئاب . . و الله يا جماعه مش اكتئاب بس بدور على عزة نفس المصري و حبه لبلده . . مش لاقي . . كل الناس اللي جت أكلت لسان حالها بيقول ( حلوه لسان حاله دي ) و بعدين . . 

ايه اللي هيحصل فينا أكتر من كده . . عن نفسي أنا متوقع أيام سودا . . بس في الآخر بعد ما بصيت للوشوش . . ندهت طبق فول بالزيت الحار ياعم 
 إبراهيم . .


( من 2010 و حتى 2013 لم يتغير الوضع و ما زلت أرى نفس المواقف و الأشخاص و ما اختلف همو أن النظرة ازدادت سوادا و تشائما .. و دمتم )

الكون بيحط علينا ليه !! ( خواطر مع سيجارتي الملفوفه )

فكرت كتير في معنى وجودنا في الحياه .. لسه مش لاقي إجابه شافيه و وافيه .. و أنا صغير سألت اللي أكبر مني .. كانت 

الإجابه واحده < إلا ليعبدون > .. بس كده يا معلم .. بعيدا عن إن كل حاجه في الإسلام المفروض عباده .. بس كل الأديان 

بتجاوب بشكل مختصر .. زي ما يكون لو عرفنا الإجابه الكامله هيجرالنا حاجه من نوعيه ( لا تخرج قبل أن تقول سبحان الله ) 

.. يا خلق ياهوووو .. انتم اتخلقتم ليه .. عشان تصوموا !! تصلوا !! و تقولوا الصدق و تتعاملوا بأمانه .. بس كدهون !! أكيد 

ربنا ما كلفش نقسه كل ده و الخلق و الكواكب عشان مصطلح العباده بس !! اللي أنا شايفه إن العبادات كلها بقت حجه للمشايخ 

عشان يحسسونا إن مفاتيح الجنه معاهم .. مش كلهم طبعا .. بس بقى في إنتشار للنوعيه دي .. و بما إن لحوم العلماء مسمومه 

.. أنا قررت أتكلم عنهم .. أصل المصطلحات دي ما بتاكلش معايا خالص .. استنى .. إنت ملحد !! أول سؤال هيجي على بال أي 

حد يقرأ الكلام ده .. و ده حصل فعلا .. انا بقى عايز أسأل .. في الدين الإسلامي .. في مصطلح اسمه  ( إعمال العقل ) .. ما

 تعمله يا أخينا .. و لا بتعمله في إزاي .. و لا بلاش .. فكر انت لسه ما تعملش عقلك في فهم الحدوته اللي انت اتحطيت فيها 

غصب عنك .. هما المشايخ الموجودين أحسن منك في ايه !! الناس بقت عايشه عشان تاكل و تشرب .. و تشرب .. و تنام .. و

 تنام .. عايشه و خلاص .. من غير ما تفهم .. من غير ما تسأل .. و سايبه دماغها و مسلماها لناس مشكوك في دينها  تانيه 

تفكرلها و تقولها ربنا عايز منهم ايه و مش عايز ايه !! طيب ما تيجوا نعمل العقل .. إسأل نفسك .. الكون بيحط علينا ليه ..

 هتقولي مافيش حاجه اسمها الكون بيعمل .. ماشي ماشي .. الإله بيحط علينا ليه .. ليه قصه الخلق من الأول ؟؟ اشمعنى انت

 دونا عن إخواتك الحيوانات المنويه الأخرى تم إختيارك .. ليه انت دونا عن ناس كتير بتتقرف في عيشتك .. لييييه إنت !! دور 

على إجابه .. إفهم سبب وجودك .. يمكن ساعتها بس تفهم دينك صح .. دور .. يمكن !!

عدنا من الموت ..... للموت ( كتبت يوم 15 أغسطس 2008 )

منذ عدة فترات مضت > كل فترة حوالي اسبوع < كنت مسافر لمدينة ما

و كان السائق يسير بسرعة تفوق حد السرعة المسموح به

كل من السيارة خائف

(( ياعم هدي )) كل من في السيارة ينادي

و لكن ينتابني شعور غريب

(( فكك منهم يا اسطى )) كان هذا ردي

استغرب الجميع

بينما تركيزي يزداد

أحسه قريبا

منجله يحصد من حولنا

لقد أقبل

هيا

ارتفعت السيارة للهواء

تحطم الزجاج

تكسرت الأعناق

صراخ الطفل على صراخ أمه

سائق السيارة يضحك

و من بجانبي قد خرجت عيناه من مقلتيه

و لسانه يتدلى

مات قبل استكمال المشهد

و على الجانب الآخر تقوقع الرجل على نفسه

أملا في النجاة

و انا

لا أبالي

لم أصرخ

لم ....... ((احنا وصلنا يا حضرات حمدلله على السلامة )) كان هذا حلم

حزنت

لأني سأعود إلى الموت

في الحياة

سأمشي بين الأموات

سأضحك بينهم

و سأضيع بينهم

ثورة 25 يناير . . ثورة شعب . . ذكريات متفرقة ( مقاله بعد ال 18 يوم )

أرجع تاني للكتابه بعد توقف مرير جدا و مش عارف بسبب ايه . .

فوجئت زيي زي ناس كتير بموضوع الإيفنت اللي على الفاس . . مظاهرة في التحرير . . مطالب بسيطة . . الموضوع يوم 25 كان درامي
الناس بتتحرك بعفوية من غير قائد . .المظاهرات طلعت من كل مكان . . الشعب طلع . . مدن ما كانتش بتتحرك بدأت تتحرك . . فجأة الموضوع بقى بجد . . جمهورية التحرير . .

الموضوع كان عبارة عن حرب شوارع و حرب نفسية بينا و بين مؤسسة الرئاسه و الإعلام و الداخليه , إلخ . . . . .. ..

كل واحد بيقول ان المكسب معاه . . ضرب نار . . رصاص حي و مطاطي
أول مرة أشم الغاز المسيل للدموع يوم جمعة الغضب . . و أنا اللي كنت فاكره غاز عادي مش هيعمل حاجه . . و طول عمري أشوفه في انتفاضة فلسطين على التلفزيون وبس . .

أنا و أصحابي بنتابع الأخبار السياسية عن طريق النت . . فجأة النت قطع . .
نعمل ايه . . عليك و على الأرضي يا ابن بلدي . .

تلفونات طول الليل . . التلفزيون ما بيتغيرش عن الجزيرة و أخواتها . . مباشر و الوثائقية لما نزهق . .
النت رجع تاني . . فيديوهات و ارفع و شير . . كان أقوى من السلاح النووي . . ده سلاح أسقط منظومة فساد عن طريق الكيبورد . .
الحق . . المساجين هربت . . بلطجة . . سرقة . . قتل . . تصفية حسابات . . انزل لجان شعبية في كل الشوارع . .
الشرعية الشعبية رجعت . .

الرئيس السابق . . اللي هوا مش أبويا . . و لو هوا أبويا ملعون يا جدع . .
خطاب سخيف ورا التاني . . لغايت ما مناخيري وجعتني من كتر . . . . . . .

حسيت بطعم الحرية . . كنت ماشي في الشارع مش خايف من أي حاجه . .
الناس بتتحرك . . الضحكة رجعت . .

محاولات سخيفة لإنقاذ ما يمكن إنقاذه من شرعية الحكومة و الرئيس . .

الجيش نزل . . الشعب و الجيش إيد . . . . . يا ترا واحدة و لا كله بيدور على مصلحته

نمنا صحينا . . الجمال و الخيول مالية الميدان . . فكرتنا بفيلم الرسالة . . و عمر المختار . . و لورد أوف ذا رينجز ( ( رينجز ) )

جمعة الصمود . . جمعة الشهداء . . جمعة التنحي . . ايييييييييييييه . . تنحي مين . .
قرر رئيس مصر السيئ الرئيس محمد حسني مبارك تسليم السلطة للجيش . . احتفلات في مصر كلها . . (( ما عدا الناس اللي لسه شايفه ان مبارك ده أحسن حاجه حصلت للبلد بعد مينا موحد القطرين . . ) )

جمعة النصر . .
الميدان بيتنضف . .ثورة بيضاء . .قلوب صافية . . ناوية تغير في المجتمع . .

ايه اللي حصل عشان الفرقة اللي احنا فيها دلوقتي . . هيا دي الوعود اللي قلنا عليها في الميدان . . شعب مصر الكريم . . ارجعوا تاني لأخلاق التحرير . . روح الحب . . الهدف في بناء مصر بلد عظيم و كله على قلب رجل واحد .
.
أنت سلفي . . و ماله ده مش عيب . . ليبرالي . . مش كافر . . إخواني . . أهلا بيك . . قبطي . . أخواتنا . . انت مين في مصر . .

كله يفتكر و يسأل نفسه السؤال ده . . الإجابه عندكم جوا كل واحد فيكم

أنا خلصت

سلام

بين ال(خرم) و سد الخرم - خواطر مع سيجارتي الملفوفه

الموسيقى , بيعتبرها البعض مذكرات ليه  , كل واحد فينا عنده مجموعة أغاني بتمثله مواقف مهمه في حياته , وفجأه بقى فيه معنى تاني للموسيقى , فبعد إنجازات الموسيقى العربيه بداية من زمن الفن الجميل و التواشيح إلى عصرنا الحالي , ظهرت الفنانة اللبنانية (نانسي عجرم) في نوع جديد في الكلمات و الكليبات في جملتها المشهورة (أخاصمك آه .. أسيبك لأ) , و لقطة نشر الغسيل الأكتر من رائعه , السيده الفاضله بدأت مشوار الـ(أباحه) في الأغاني و بدأت معاها أزمة منتصف العمر للمجتمعات العربية , رجالة كتير طلقوا ستاتهم عشان هما يا إما هما مش بنفس دلع نانسي أو بيغيروا منها , وظهرت فتاوى تحريم للي "نونا" كانت بتعمله , بس ياريتها جت على قد كده , ظهرت المرأة اللي قدرت تاخد لقب المرأه الحديديه من نادية الجندي الرائعه (هيفاء وهبي) متمثلة في أشهر أغانيها (بوس الواوا .. يح) وقدرت تكون حلم شباب كتير في المنام , ومثل أعلى لبنات كتير , ظهرت مغنيات كتير بيتبعوا نفس المدرسة على سبيبل المثال الكليب التاريخي لنجلاء و الحصان , و مروه في معظم أغانيها , و ظهر في الموسيقى خرم الـ(أباحه) و بدأ الطفح الفني يظهر بشكل متعمد .. خد عندك مثلا الموسيقى اللي بيتقال عليها شعبي دلوقتي تحولت من أحمد عدوية و روعة أغانيه لسوق خضار و فاكهه مع بعرور و سعد الصغير بمصاحبة دينا الرقاصه , و بقى هز الوسط العلامة المميزة للراجل في الأفراح . وطبعا موضوع الإيحاءات الجنسية في الأغاني عادي جداً , و رسخ المفهوم ده من قريب الجميل (محمود الليثي) في سوق البنات و أغنيته مع القديرة (بوسي) "حط إيده ياه ! " و كان السؤال المنتشر لأي حد سمع اسم الأغنيه : حط إيده فين ؟؟ , ده طبعا غير السؤال اللي أستاذ تامر حسني خلانا نسأله بعد كليب (أجمل حاجه فيكي) : ايه هيا أكتر حاجه جميلة بالنسباله .................... (أكمل الفراغ انت و طريقة تفكيرك ..

 انا عن نفسي هحتفظ بإجابتي لنفسي عشان الست الوالده بدأت تقرأ المجله .. و اكتمل الخرم الموسيقي بالمهرجانات و بقى معظم الجيل الجديد بيعاكس بطريقة (أوكا و أورتيجا) "هاتي بوسة يا بت .. هاتي حته يا بت" .. و بقى مفهوم الحب الجديد هو مرحلة البوس و الأحضان كبداية إنما المشاعر "ياراجل كلها شكليات .. الحب بيجي بعد ............" كملوا انتم .. الحاجه اللي مش مفهومه بالنسبالي فعلا هوا إزاي بقت الموسيقى عبارة عن مبيعات فقط .. بمعنى " كل ما تتزنق اقلع !!" .. في أوروبا و الدول المتقدمه بيقلعوا بس في مزيكا بتتسمع و هيا ثقافتهم كده .. إنما القلع اللي في الكلمات و الكليبات اللي عندنا ده طلع جيل بحاله بيدور على كلمة واحد في جوجل و نرمز ليها برقم 6 ..  طيب .. كده الـ(خرم) بصورة عامه لأن لو دخلنا في تفاصيل هلاقي المقالة بقت +18 .. نسد الـ(خرم) إزاي .. دي من وجهة نظري جوا كل واحد فينا .. لأن نقابة الموسيقى و الرقابه ما عندهمش مشكله تقريبا مع الموضوع ده .. إحنا لو كل واحد فينا اتجه إنه يسمع أغاني نضيفه و ينشرها هيبقى في بديل و محترم كمان .. و نعملها عدوى .. و كل ما العدوى هتنتشر الـ(خرم) هيضيق  .. بس كد ياعم الحج .. هيا دي حكاية الخرم .. سدوه انتم بقى !!

ملحوظه : كتبت المقالة دي تحت تأثير أغنية يبكي و يضحك للشيخ زين .. دوروا عليها و اسمعوها .. و تعالوا نبتدي حملة سد الـ(خرم) .. و دمتم سالكين

ده المَرَلْ اللي فات < توهان > .. خواطر مع سيجارتي الملفوفه

يمكن إزازة جاك دانيلز تحل التوهان اللي احنا فيه !! بدايه غير منطقيه لمقال مش مفهوم رايح على فين .. المقال ده موجه للناس اللي عايزه تتعرف على عالم هوبا هااااي ..   في البدايه نشرح يعني إيه مَرَلْ للي مش عارف .. دي مرحله من مراحل شرب الحشيش .. و اللي ما يعرفش الحشيش ده فايته كتير جداً .. المَرَل : هوا ورقه بنتنيها نصين و نحط التبغ و الحشيش جواه و نفركهم كويس عشان الحشيش ما يِحَصْوِلش (ما يبقاش بودره يعني ) و بعدها بنحط المكون النهائي في ورقة بفره و نلف و نلزق و نولع .. سهره سعيده .. محور المقاله إن احنا هنتكلم عن حياة الديلر .. و هوا بيشوف الناس اللي بيبيعلهم إزاي .. و بيتعامل مع كل الطبقات من أوسخ طبقه لأنضف طبقة في المجتمع .. الديلر الكويس ليه مواصفات مهمه .. بيتعرف في الأول من اصطفته (نوع الحشيش اللي بيبيعه) بلدي و لا مغربي .. نضيفه و لا عليها كيميا .. بيكرم الزبون و لا همه على الفلوس .. كل الصفات دي لما بتبقى في ديلر بيبقى عامل زي الجنيه الدهب .. لو حد فيكم الديلر بتاعه فيه الصفات دي " ابقوا افتكرونا بإصطباحه " .. أنوا البشر اللي الديلر بيتعامل معاها مش هنقدر نحصرها بس هنحط أمثله من أهمهم : أول نوع هوا الفاجر الفاهم الصايع .. ده بيبقى أرزل نوع .. مع أول نفس من أول سيجاره بتلاقيه سافر عند القمر .. و مع كده بيحب يبين إنه ما اتسطلش و انه فاهم كل حاجه .. النوع ده لما بيروح يشتري بيتضحك عليه بسهولة جداً .. لأنه ببساطه مش فاهم حاجه .. ما يعرفش يفرق بين الحته المحمِله و الحته السلخه [ المحمله : طولها و عرضها مناسبين و كمية الحشيش فيها كتير , السلخه : بتبقى رفيعه و لا طول و لا عرض و لا تعمل سيجارتين ] .. النوع التاني هوا الشاب الجميــــــــــــل .. صاحب نظريه : كلنا هنموت مزيتين من كتر الحشيش .. النوع ده المفضل عند الديلر .. عشان ده لما بيسقط [ بيلاقي يعني ] ديلر كويس بيشهره .. بينشر رقمه بين صحابه  و بيكبر تجارته على قد ما يقدر .. و دايماً الديلر بيكرم الشاب ده على قد ما يقدر كل مره يقضي فيها من عنده ..  الشاب الجميـــــل ده فاهم في الحشيش جداً رغم إنه ما يبانش عليه .. و دايماً بيحب يشرب مع شباب جميـــله زيه .. و بيكره يشرب مع أشخاص من النوع الأول اللي قلناه .. في بقى نوع تالت هنختم بيه المقاله دي .. النوع ده بنطلق عليه : الشاب أبو ضحكه جنان .. و ده هوا صاحب مقوله : هنكلمك لما نبقى سكرانين .. النوع ده دايما بيدور على الضحكه لما يشرب .. ما بيحبش يسكت .. و ممكن يعمل حركات غير مفهومه للجنس البشري في حالته العقليه الطبيعيه  لمجرد إنه مبسوط .. النوع ده فيه ميزه .. ساعات بيبقى الجزء التاني من شخصية الشاب الجميــــــل و بيتحول ساعتها للشاب الجميـــــل أبو ضحكه جنان .. ده ممكن الديلر يشغله معاه أصلاً .. القعده معاه ما فيهاش زهق .. دايما بيحب يجرب كل جديدي في عالم الشرب .. و ما يقولكش لأ على سيجاره .. و ساعات بيبقى المرحله التانيه لأي شاب بيصطبح [بيشرب حشيش] إنه يتحول لهذا النوع .. و ساعتها تحب تقعد معاه و هوا شارب بس .. و من كل الكلام اللي قلناه نوصل لمعادله مهمه جداً .. الأدب فضلوه عن الحشيش .. و الحشيش فضلوه عن العلم .. ناخد الحشيش عامل مشترك و نشيله من المعادله . هتبقى : الأدب فضلوه عن العلم .. لا هتلاقي أدب و لا علم .. بس هتلاقي حشيش .. يلا على البركه

قلب الموت .. قلب الحياة !!

منذ عدة أشهر أصبحت أتلقى من المكالمات أخبار وفاة فلان و علان .. يوماً بعد يوم .. عزاء من بعده عزاء آخر .. و من جنازة إلى جنازة .. أصبحت أزور المقابر أكثر من زيارتي لأماكن الحياة الأخرى .. لم أدرك ماهية الرسالة من هذه الفترة في حياتي .. أصبحت فجأة في قلب الموت .. هذا الإسم البغيض .. مرتبط دائما بذكرياتي عن وفاة والدي .. و كيف وقفت عاجزاً عندما فارقت روحه الجسد .. ظل هذا الإسم يتردد على مسامعنا .. نحس منه برهبة .. فجأة لم يعد يخيفنا .. تلخص الموت في مقولة " البقاء لله " .. و بضع دمعات تنساب على الوجنات معلنة تضامن المعزي مع صاحب العزاء .. دخول المقابر أصبح هواية شهرية .. و إن لم تدخلها على الأقل مرة شهرياً فذلك يدل على مشكلة عندك .. لا أعلم ما هي لكن بالطبع لديك مشكله .. لكن ما هي الفائده .. ما هي الحقيقه ؟؟ و لم فقد الموت ما كان يمتلكه من خوف و هيبه .. بالنسبة إلي الرسالة الوحيده هي أن أستغل ما تبقى لي من العمر في ما قد يذكره عني غيري .. لأزيد عدد المعزين في بعد مماتي .. و أصبحت المعادله كالتالي .. قلب الموت هو في نفس الوقت قلب الحياة !!

أول تدوينه

السلام بداية .. أنا عبدالرحمن حماد .. بيدو .. هكمل 25 سنه في شهر 9 اللي جي .. برج العذراء .. تخين .. نكشت شعري و لبستله سولتيت .. بغني راب في فريق اسمه Egy Lions Family بقالي 6 سنين أهو داخل على السابعه .. بكتب خواطر مع سيجارتي الملفوفه في مجلة إعدلها .. و فاشل دراسيا بمعنى الكلمه .. بس كده .. هحط هنا الخواطر اللي مش هعرف أكتبها في المجله .. و أي خاطره  صغيره .. يلا سلام بقى عشان هقفل و أسمع مزيكا ..